Kirkjukór Útskálasóknar
Kirkjukór Útskálakirkju hefur starfað í fjölda mörg ár, en formlega var hann stofnaður 1946 af þáverandi söngmálastjóra Þjóðkirkjunnar, Sigurði Birkis.  Kórfélagar voru upphaflega 22 og var Auður Tryggvadóttir söngstjóri og organisti.  Hún stjórnaði kórnum í 40 ár, lengst allra í þessu starfi, enda þótti öllum í kórnum afar vænt um Auði.  Síðan hafa margir organistar starfað við kirkjuna, lengst 9 ár, 6 ár og allt niður í 1 ár, allir mjög hæfir í sínu starfi.  En skýringin á því af hverju sumir stjórnendur hafa staldrað svo stutt við er að margir hafa farið í meira nám erlendis.  Kirkjukór er ætlað að annast söng við guðsþjónustur, skírnir, giftingar og útfarir.  Einnig höfum við tekið þátt í kóramótum í Kjalarnesprófastdæmi.  Þá eru aðventutónleikar orðnir árviss viðburður og eru þeir sameiginlegir með Hvalsness- og Útskálasókn, enda sami kórstjóri með báða kórana.
Kórstarf er krefjandi en jafnframt gefandi og mjög góður félagsskapur.  En því miður hefur gengið illa á seinni árum að fá fólk í kórinn og höfum við því orðið að fá fólk úr Sandgerði og Keflavík sérstaklega við útfarir og á hátíðum, því það er ekki spurning að allir vilja góðan kór í kirkjunni.

Kæru Garðmenn, höfum þann metnað gagnvart kirkjunni okkar að efla góðan söng.  Endilega komið og prófið, það verður tekið vel á móti öllum.  Því fleiri sem eru í kór, því meiri möguleikar á að gera margt skemmtilegt.  Söngurinn göfgar og gleður!

Með kærri kveðju,
Kirkjukór Útskálasóknar
Nánari upplýsingar um kórstarfið veita Kristín   422 7091 og Dagbjört  422 730.